Vullnet Jakupi (l. 2000) është një artist multidisiplinar nga Prishtina, Kosovë, i cili punon kryesisht me instalacione dhe video art. Vepra e Jakupit shpesh buron nga vendet ku historia dhe narrativa personale takohen, ku heshtja mban peshën e asaj që njëherë është thënë ose bërë. Ai është i interesuar për gjurmët që mbeten pas: objektet e braktisura, arkitektura e rindërtuar, shikimet e përbashkëta të atyre që kujtojnë. Përmes këtyre fragmenteve, ai kërkon një gjuhë që flet për qëndrueshmëri, zhvendosje dhe forcën e heshtur të mbijetesës. Nga ana tjetër, për të, krijimi i artit në Kosovë do të thotë të punosh brenda një peizazhi që ende po shërohet dhe po ripërcakton veten. Në këtë proces, ai sheh jo vetëm dhimbje, por edhe potencial.
Gjatë rezidencës INFRARED, Jakupi do të zhvillojë dhe finalizojë projektin e tij “Dikund, n’brendësi, rikthehem.” Projekti hulumton hapësirat e braktisura në dhe rreth Prishtinës, duke u fokusuar në bimët që i kanë rimarrë ato me kalimin e kohës. Duke rikthyer herbariumin si praktikë njëkohësisht shkencore dhe nostalgjike, ai do të organizojë vizita të përbashkëta ku pjesëmarrësit do të mbledhin dhe studiojnë florën që është shfaqur në këto vende.
Përmes ecjeve dhe rrëfimeve të përbashkëta, projekti zhvendos vëmendjen drejt mënyrës se si natyra rikthen hapësirën e saj në mungesë të ndërhyrjes njerëzore, duke reflektuar mbi proceset ekologjike që zhvillohen në mënyrë të pavarur. Pjesëmarrësit do të krijojnë herbariume të personalizuara, të shoqëruara me narrativa që lidhin kujtesën, hapësirën dhe natyrën.
